URUKIKO RUKURU RWA GISIRIKARE

REPUBULIKA Y’U RWANDA URUKIKO RUKURU RWA GISIRIKARE ICYEMEZO N° 0001/010/HCM CY’URUKIKO GITEGEKA ABAKURIKIRANYWEHO IBYAHA BATOROTSE IGIHUGU CYANGWA BIHISHE UBUTABERA KWITABA KUBURANA. Umwaka w’ibihumbi bibili na cumi, umunsi wa 15 w’ukwezi k’Ugushyingo, twebwe Brig Gen John Peter BAGABO,Visi Perezida w’Urukiko Rukuru rwa Gisirikare, tubifashijwemo na Lt Jean de Dieu RUTAYISIRE, Umwanditsi Mukuru w’urwo Rukiko; Tumaze kubona Ubushinjacyaha bwa Gisirikare bwohereza dosiye ifite N° RAM 0547/10/MGF/2010 mu Rukiko Rukuru rwa Gisirikare igahabwa N° RP 0008/010/HCM, burega: a. Lt Gen Faustin KAYUMBA NYAMWASA mwene SENUMUHA na MUKANYONGA, wavukiye i Rukunguri muri Uganda tariki ya 28/03/1958, Umusirikare mu Ngabo z’u Rwanda (RDF), watorotse igihugu, washakanye na KAYUMBA Rosette; b. Maj Théogène RUDASINGWA mwene GAHIGANKWAVU Hermenegilde na BAMUSUSIRE Collette, wavukiye i Zaza /Sake/Intara y’Iburasirazuba mu mwaka w’1961, Umusirikare mu Ngabo z’u Rwanda (RDF), watorotse igihugu, washakanye na RUDASINGWA Dorothée; c. Civil GAHIMA Gérard mwene GAHIGANKWAVU Hermenegilde na BAMUSUSIRE Collette, wavukiye i Zaza /Sake /Intara y’Iburasirazuba ku itariki ya 15/03/1955, wihishe ubutabera, washakanye na MUSEMINARI Marie Anne; d. Civil KAREGEYA Patrick mwene KANIMBA John na KANIMBA Jane, wavukiye Rubare/Uganda mu mwaka w’1960, wihishe ubutabera, washakanye na KAREGEYA Leah; Ubushinjacyaha bwa Gisirikare bubakurikiranyeho ibyaha bivutsa igihugu umudendezo, ibyaha bihungabanya Leta, icyaha cyo gukurura amacakubiri, ibyaha byo gusebanya n’ibitutsi n’icyaha cyo kurema umutwe w’abagizi ba nabi. By’umwihariko Lt Gen Faustin KAYUMBA NYAMWASA na Maj Théogène RUDASINGWA kuri ibyo byaha bivuzwe hiyongeraho icyaha cyo gutoroka igisirikare. Dufashe icyemezo N° 0001/010/HCM kibategeka kwitaba Urukiko Rukuru rwa Gisirikare mu rubanza RP 0008/010/HCM baregwamo n’Ubushinjacyaha bwa Gisirikare bitarenze tariki ya 15/12/2010, batakwitaba bigafatwa nk’aho basuzuguye amategeko, bityo bagacirwa urubanza nk’abatorotse igihugu cyangwa bihishe ubutabera. Dushingiye ku ngingo za 196, 197, 198 z’Itegeko n0 13/2004 ryo kuwa 17/05/2004 ryerekeye imiburanishirize y’imanza z’inshinjabyaha nkuko ryahinduwe kugeza ubu, dutegetse ko iki cyemezo cy’Urukiko kimanikwa ku Cyicaro cyUrukiko Rukuru rwa Gisirikare, ku biro by’Uturere twa Gasabo, Kicukiro na Nyarugenge no ku Buyobozi Bukuru bw’Ingabo z’Igihugu (RDF HQS). Dutegetse kandi ko mu gihe cy’iminsi umunani (08) iki cyemezo gitangazwa mu kinyamakuru THE NEW TIMES. Bikorewe i Kigali, none kuwa 15/11/2010 Brig Gen John Peter BAGABO Visi Perezida w’Urukiko Rukuru rwa Gisirikare Lt Jean de Dieu RUTAYISIRE Umwanditsi Mukuru w’Urukiko Rukuru rwa Gisirikare

Advertorial

URUKIKO RUKURU RWA GISIRIKARE